Вьетнамда бірнеше күннен бері толассыз жауған жаңбыр салдарынан су тасқыны мен жер көшкіні болып, 28 адам қаза тапты, тағы 6 адам із-түзсіз жоғалған, деп хабарлайды kznews.kz.
Ең көп зардап шеккен аймақтар — Хюэ және Да Нанг қалалары. Табиғи апат салдарынан 22 мыңнан астам тұрғын үйді су басып, көптеген инфрақұрылым нысандарына зақым келген. Сонымен қатар 245 мыңға жуық отбасы электр қуатынсыз қалған.
Жергілікті билік өкілдерінің мәліметінше, іздестіру-құтқару жұмыстары әлі де жалғасып жатыр. Кейбір пойыз бағыттары қайта ашылғанымен, бірқатар теміржол және автокөлік жолдары әлі де жабық.
Синоптиктердің болжамынша, нөсерлі жаңбыр 4 қараша түніне дейін жалғасуы мүмкін. Төтенше жағдай қызметтері тұрғындарды қауіпсіз жерге көшуге және өз бетімен қозғалыс жасамауға шақырып отыр.
