2026 жылдан бастап ҰҚШҰ-ның бас хатшысы Қырғызстан өкілі Таалатбек Масадықов болады. Бұл туралы Ресей президентінің көмекшісі Юрий Ушаков мәлімдеді, деп хабарлайды kznews.kz.
Ушаковтың айтуынша, Масадықов 2026 жылдың 1 қаңтарынан бастап Ұжымдық қауіпсіздік шарт ұйымының жаңа бас хатшысы қызметіне кіріседі. Ол қазіргі бас хатшы Иманғали Тасмағамбетовтің орнына келеді.
Қазір Масадықов ұйым бас хатшысының орынбасары қызметін атқарып жүр. Барлық ресми рәсімдер аяқталғаннан кейін ол өз құзыретін толық көлемде атқара бастайды. Ушаков сонымен бірге Тасмағамбетов 27 қарашада Бішкекте өтетін саммитте өңірлік қауіпсіздік мәселелеріне арналған баяндама жасайтынын, содан соң оған ҰҚШҰ-ның бірінші дәрежелі құрмет белгісі табысталатынын айтты.
Юрий Ушаков Тасмағамбетовтың 1 қаңтардан бастап қызметін тоқтататынын, ұйымдағы басшылық ауысымы мүше мемлекеттердің келісімімен жүзеге асқанын мәлімдеді.
Айта кетейік, Иманғали Тасмағамбетов ҰҚШҰ бас хатшысы қызметін 2023 жылдың қаңтарынан бері атқарып келеді.
