21 сәуір, 2026
Қазақстанда 2027 жылдан бастап пилоттық режимде AIT (Admission Insight Test) атты жаңа қабылдау тестін ҰБТ-ға балама ретінде енгізу жоспарланып отыр. Бұл туралы Ақорда кулуарларында ғылым және жоғары білім министрі Саясат Нұрбек мәлімдеді, деп хабарлайды kznews.kz.
Жаңа емтихан ETS компаниясымен бірлесіп әзірленуде. Компания делегациясы жақында Астанаға келіп, шетелдік университеттердің филиалдарымен алғашқы кездесулерін бастады.
«Жаңа тесттің артықшылығы — оның нәтижелерін шетелдік университеттердің барлық филиалдары қабылдайды. Себебі бұл — ETS, яғни жоғары сапа стандарты. Олардың тесті автоматты түрде қабылдау рәсімдерінде мойындалады. Шетелдік университеттер де оны қабылдайды», — деді Нұрбек.
Министр негізгі емтихан сақталатынын, ал AIT талапкерлерге қосымша түсу мүмкіндігі ретінде ұсынылатынын атап өтті. Сондай-ақ сынақ тесттерін тапсыру мүмкіндігі де сақталады.
2025 жылдың желтоқсанында AIT-ті пилоттық режимде 2027 жылы іске қосу мүмкіндігі қарастырылып жатқаны хабарланған болатын.
