Қазіргі уақытта мектеп ғимараты айтарлықтай шамадан тыс жүктемемен жұмыс істеп отыр: оқушылар саны екі есе артық, ал кейбір сыныптар екінші ауысымда оқуға мәжбүр. Бұдан бөлек, мектеп ғимаратының сейсмикалық тұрақтылығы мен білім беру стандарттарына сәйкестігі жеткіліксіз екені айтылды.
Білім басқармасы басшысының орынбасары Мұхтар Тәжібаев жаңа нысан қала талаптарына сай салынатынын атап өтті:
«Жаңа мектеп бір ауысымда жұмыс істейді. Онда кеңейтілген білім беру бағдарламасы мен заманауи инфрақұрылым болады. Негізгі мақсатымыз – балаларға жарық, кең әрі қауіпсіз сыныптар ұсыну», – деді ол.
Алматы қаласы Жер қатынастары басқармасының өкілдері жер телімдерін мемлекет қажетіне алу рәсімін түсіндірді. Кейбір тұрғындар жер аумағы тұрғын үй кешенін салуға беріледі деген қауіп білдірген. Алайда басқарма бұл ақпаратты жоққа шығарды:
«Мемлекет қажетіне алынған жерлер тек мақсатты түрде пайдаланылады және жеке тұлғаларға немесе коммерциялық жобаларға берілмейді. Бұл жағдайда тек білім нысанының құрылысы туралы сөз болып отыр», – деп мәлімдеді ведомство.
№20 мектеп директоры Гүлнар Сарсенбаева да жобаның маңыздылығын атап өтті:
«Мектеп үнемі шамадан тыс жүктемемен жұмыс істеп келеді. Кеңейту арқылы балаларға қолайлы оқу ортасын қалыптастыруға мүмкіндік туады», – деді ол.
Алматы қалалық мәслихатының депутаты Бейбіт Құсайынов тұрғындардың барлық өтініштері ескерілетінін және талқылау ашық форматта өтетінін айтты:
«Бұл – әлеуметтік бағыттағы жоба. Біз үшін бастысы – ашықтықты қамтамасыз ету, азаматтардың заңды құқықтарын сақтау және білім беру саласын дамыту жөніндегі мемлекеттік міндеттерді орындау», – деді депутат.
№20 мектепті кеңейту жобасы Алматыдағы білім беру инфрақұрылымын жаңғыртудың кешенді бағдарламасының бір бөлігі болып табылады. Қала билігі білім саласын стратегиялық бағыт және адами капиталды дамытудың негізгі факторы ретінде қарастырып отыр.
