Енді 15 жасқа толмаған балаларға аккаунт ашуға тыйым салынып, жасөспірімдердің онлайн қарым-қатынасына да бірқатар талап қойылады, деп хабарлайды kznews.kz
Жаңа талаптар 10 қазанда Түркияның ресми басылымы Resmî Gazete-де жарияланды. Олар 2026 жылғы 1 қарашадан бастап күшіне енуі тиіс.
"15 жастан асқан жасөспірімдер үшін қауіпсіздіктің арнайы режимі қарастырылған. Олардың парақшалары жабық болуы керек. Ал хат алмасу тек жазылушыларына қолжетімді болады. Сондай-ақ жасөспірімдер тікелей эфир жүргізе алмайды, жекелендірілген жарнама мен басқа аккаунттардың ұсыныстарын алмайды. Бұған қоса, телефон кітапшасындағы немесе бөгде сервистердегі контактілерді автоматты түрде көшіруге де рұқсат етілмейді", – деп жазады басылым.
Жаңа ережелер ата-ананың бақылауына да қатысты. Әлеуметтік желі платформалары ересектерге балалардың аккаунт баптауларын басқаруға, экран алдында өткізетін уақытын шектеуге және төлемдерді растауға мүмкіндік беруі тиіс.
Сонымен қатар платформалар тіркелетін пайдаланушылардың жасын Түркияның e-Devlet мемлекеттік жүйесі арқылы тексеруге міндеттеледі. 15 жасқа толмаған балаларға әлеуметтік желілерде профиль ашуға тыйым салынады.