Бүгін, 20:17
Ресейдің Омбы қаласында Ресей президенті Владимир Путин мен Қазақстан президенті Қасым-Жомарт Тоқаевтың кездесуі өтті.
Келіссөздердің ашық бөлігінде Мемлекет басшысы Украинадағы қақтығысты уақытша тоқтатып, дипломатиялық жолмен шешу қажеттігі туралы пікір білдірді. Президент бұл өз ұстанымы екенін, ал Қазақстанның делдалдыққа ұмтылып отырмағанын атап өтті.
Тоқаевтың айтуынша, қазіргі жағдайда қақтығыс жаңа сипатқа ие болды. Майдан шебіндегі жағдай күрделі күйінде қалып отыр. Ресей әскері шабуыл әлеуетін сақтап отырса, Украина әскери және экономикалық бағыттағы әрекеттерге көбірек сүйенуде. Соның ішінде мұнай өңдеу инфрақұрылымына, логистикалық нысандарға және Каспий құбыр консорциумының инфрақұрылымына жасалған шабуылдар бар.
Бұл жағдай Қазақстанға да жанама әсерін тигізіп отыр. Сондықтан Мемлекет басшысының мәлімдемесі қақтығысқа сырттай бақылаушы емес, оның экономикалық салдарын сезініп отырған елдің ұстанымы ретінде бағалануы мүмкін.
Президент сондай-ақ, қазіргі ахуалдың болжауға келмейтінін айтып, бейбіт келісімге қол жеткізу үшін қажетті алғышарттардың әлі қалыптаспағанын жеткізді.
Жалпы, АҚШ пен НАТО елдерінің Украинаға әскери көмегі жалғасып жатыр. Сонымен қатар, Ұлыбритания тарапынан соғыс аяқталғаннан кейін немесе бітім жасалған жағдайда Украина аумағына өз әскери контингентін орналастыру мүмкіндігі туралы мәлімдемелер де айтылған. Мәскеу мұндай бастамаларды қабылдамайтынын бірнеше рет мәлімдеген.
Осылайша, қазіргі жағдайда қақтығыстың жақын арада аяқталуына нақты алғышарттар байқалмайды. Ал Қазақстан үшін ұзаққа созылған соғыс өңірлік қауіпсіздік пен экономикаға қосымша тәуекелдер туғызады. Сондықтан Астана бейбіт келіссөздерді қолдап, ұзақ мерзімді тұрақтылыққа бағытталған дипломатиялық күш-жігердің маңызын атап келеді.
