Бүгін, 15:23
Президент Қасым-Жомарт Тоқаев альпинист Ерванд Ильинскийге "Қазақстанның Еңбек Ері" атағын беру туралы жарлыққа қол қойды, деп хабарлайды kznews.kz Ақордаға сілтеме жасап.
"Альпинизмдегі аса үздік жетістіктері, сондай-ақ елдегі спортты дамытуға қосқан елеулі үлесі және қоғамдық қызметке белсенді қатысқаны үшін Ерванд Тихонович Ильинскийге жоғары дәрежелі ерекшелік белгісі – "Қазақстанның Еңбек Ері" атағы берілсін", - делінген жарлық мәтінінде.
Қазақстанның альпинизм және құзға шығу порталындағы мәліметке сүйенсек, Ерванд Ильинский 1968 жылдан бері КСРО спорт шебері, ал 1982 жылдан бері халықаралық дәрежедегі спорт шебері және КСРО-ның еңбек сіңірген спорт шебері.
Сонымен қатар ол басқа да атақтарға ие:
1973 жылдан бастап альпинизмнен ЦСКА аға жаттықтырушысы;
1975 жылдан бастап Қазақ КСР-нің еңбек сіңірген жаттықтырушысы;
1979 жылдан бастап КСРО-ның еңбек сіңірген жаттықтырушысы.
Бапкерлік мансабында ол КСРО мен Қазақстан Республикасының 100-ден астам спорт шеберін, соның ішінде 33 халықаралық дәрежедегі спорт шеберін және 23 еңбек сіңірген спорт шеберін дайындаған.
