Бүгін, 14:10
Президенттің айтуынша, елде Әділетті Қазақстан құру бағытында жұмыстар жүргізіліп, қоғамда әділеттілік қағидаттары дәріптеліп келеді. Ол әділеттілікті ең жоғары рухани құндылықтардың бірі ретінде атап өтті.
Мемлекет басшысы Қасым-Жомарт Тоқаев Қазақстанның қалыптасуы мен дамуына үлес қосқан тұңғыш президент Нұрсұлтан Назарбаевтың еңбегіне әділ баға берілуі керектігін мәлімдеді, деп хабарлайды kznews.kz.
«Біз бәріміз біртұтас қоғам болып Әділетті Қазақстанды құру ісін қолға алдық. Әділеттілік қағидаттарын халқымыз арасында дәріптеп жатырмыз. Шын мәнінде, әділеттілік ең жоғары рухани құндылық десек дұрыс болады. Жаңа партияға «Әділет» атауын бердік», – деді Қасым-Жомарт Тоқаев.
Мемлекет басшысы тарихи оқиғалар мен тұлғалардың еңбегіне баға бергенде әділдік ұстанымын басшылыққа алу маңызды екенін де айтты. Оның пікірінше, тәуелсіз Қазақстанның іргесін қалауға және мемлекеттің күрделі экономикалық кезеңдерден өтіп, жетістіктерге жетуіне үлес қосқан адамдардың еңбегі ескерусіз қалмауы керек.
«Сондықтан Егемен Қазақстанның негізін қалауға, оның өте күрделі экономикалық жағдайда дамуына, еліміздің көптеген тарихи жетістікке қол жеткізуіне зор үлес қосқан тұңғыш президент Нұрсұлтан Әбішұлы Назарбаевтың есімі ешқашан ұмытылмайды деп ойлаймын. Себебі, бұл – әділеттілікке сай келетін мәселе», – деді Президент.
Тоқаевтың сөзінше, ел тарихына қатысты баға беру кезінде тарихи еңбекті мойындау мен әділетті көзқарасты сақтау маңызды.
