25 қараша, 2025
Көлік вице-министрі Мақсат Қалиақпаров мереке күндері әуе және теміржол билеттерінің бағасы күрт өспейтінін айтты. Оның айтуынша, келесі жылы да тасымал құнын қымбаттату жоспарда жоқ, деп хабарлайды kznews.kz.
Вице-министр Қазақстанның негізгі бағыттарында рейстер мен пойыздардың саны артатынын мәлімдеді. Бұл өзгерістер әуе және теміржол қатынасына бірдей әсер етеді.
«Әуе рейстері көбейеді. Танымал бағыттарға қосымша рейстер қойылып, орын саны кеңейтіледі, жаңа бағыттар ашылады. Бұл әсіресе Алматы, Шымкент және Ақтау бағыттарына қатысты. Теміржолда да қосымша пойыздар шығып, қолданыстағы бағыттарға тіркемелі вагондар қосылады», – деді Қалиақпаров.
Сонымен қатар ол билет бағасының қымбаттауы күтілмейтінін атап өтті.
«Бағаның жалпы өсуі болмайды. Жолаушылардың жартысынан астамы сапарын алдын ала жоспарлап, билеттерді ерте сатып алады. Бұл алдағы мерекелерге де қатысты. Келесі жылы билет бағасын көтеру жоспары жоқ», – деді вице-министр.
Айта кетейік, FlyArystan 17 қарашадан бастап Ақтау – Дубай – Ақтау рейстеріне билеттерді 100 долларға дейін арзандатқанын хабарлады. Лоукостер күз-қыс маусымына арналған бұл бағыт бойынша арнайы жеңілдік ұсынуда.
