Бүгін, 19:46
Тележурналист Азамат Әбілқайыр өңірдегі геосаяси ахуалға қатысты пікір білдірді, деп хабарлайды kznews.kz.
Оның айтуынша, Иран төңірегіндегі текетірес қауіп-қатерлердің кейде алыстан емес, ең жақын геосаяси ортадан туындайтынын көрсетті.
Осыған байланысты журналист Қасым-Жомарт Тоқаев ұстанымын еске салды. Мемлекет басшысы өңірлік ынтымақтастықтың маңызын үнемі атап өтіп келеді. Президент Орталық Азия елдері арасындағы тату көршілік қарым-қатынасты нығайтудың, сенімді диалогты дамытудың және сауда-экономикалық байланыстарды кеңейтудің стратегиялық мәніне ерекше назар аударады. Оның пікірінше, дамушы және орта державалар үшін ұзақ мерзімді тұрақтылықты қамтамасыз ету мақсатында өзара тығыз ықпалдастық орнату аса маңызды.
Азамат Әбілқайыр жаһандық турбуленттілік жағдайында көрші мемлекеттер арасындағы өзара түсіністік пен прагматикалық ұстаным қауіпсіздіктің негізгі факторына айналатынын атап өтті. Сонымен қатар ол Қазақстанның байыпты әрі теңгерімді сыртқы саяси бағытына тоқталып, күрделі аймақтық ортада салмақты саясат жүргізіп отырған Иордания тәжірибесін мысалға келтірді.
