Бүгін, 10:20
Шымкент қаласында Наурыз мерекесі аясында өткен «DamDastour» халықаралық гастрономиялық фестивалі өз мәресіне жетіп, мегаполистің мәдени өміріндегі ең жарқын оқиғалардың біріне айналды, деп хабарлайды kznews.kz. Әл-Фараби алаңы бірнеше күн бойы әлем асханалары тоғысқан ерекше гастрономиялық кеңістікке айналды.
Фестивальдің басты ерекшелігі – оның халықаралық деңгейде өтуі. Бельгия, Швейцария, Франция, Түркия, Грузия, Әзербайжан, Ресей, Қырғызстан және Өзбекстаннан келген танымал аспаздар ұлттық тағамдарын ұсынып қана қоймай, кәсіби тәжірибелерімен бөлісті. Халықаралық байқаулардың жеңімпаздары ұсынған авторлық мәзірлер фестивальдің кәсіби деңгейін айқындады.
Байқау қорытындысы бойынша:
«Ең жақсы палау» — Grand Golden Hills мейрамханасына,
«Ең дәмді самса» — Qazaq Samsa мейрамханасына,
«Ең үздік ұлттық тағам» — «Понтос» мейрамханасына берілді.
Ал «Камал ата» кафесі белсенді қатысқаны үшін арнайы марапатқа ие болды.
Фестивальге қаладағы 50-ге жуық мейрамхана қатысып, келушілерге ұлттық және әлемдік асхананың кең таңдауын ұсынды. Қонақтар қазақтың дәстүрлі тағамдарынан бастап, еуропалық және азиялық ас мәзірлерін татып көрді. Сонымен қатар, наурыз көженің бірнеше түрі ұсынылып, мерекелік дастарханның сәнін арттырды.
Іс-шара тек гастрономиямен шектелмей, ауқымды мәдени бағдарламаға ұласты. Бір сахнада street style және K-pop би сайыстары, ұлттық домбыра өнері, батырлар шоуы мен цирк қойылымдары қатар ұсынылды. Сонымен бірге, мотошеру, автошоу, қолөнершілер жәрмеңкесі және түрлі тақырыптық аймақтар фестивальдің мазмұнын толықтырды.
Осылайша, «DamDastour» фестивалі Шымкенттің халықаралық гастрономиялық және мәдени орталық ретіндегі әлеуетін айқын көрсетті. Түрлі халықтардың тағамы мен дәстүрін тоғыстырған бұл шара Наурыз мейрамын заманауи форматта жаңғыртып, қала өміріндегі маңызды оқиғалардың біріне айналды.
