Шымкент әкімі Ғабит Сыздықбеков оның бұрынғы орынбасары Руслан Берденовке жасалған қастандық ісі бойынша сотталған адамның мәлімдемелеріне пікір білдірді. Бұған дейін айыпталушы Берденов өзінен әкімді шабуылдың «тапсырыс берушісі» ретінде атауды сұрағанын айтқан болаты, деп хабарлайды kznews.kz.
«Әр адамның өз пікірін айтуға құқығы бар. Менің бұл іске қатысым бар дегені жай ғана жорамал. Менің бұған қандай қатысым болуы мүмкін? Әрине, адам өзін қорғау үшін бәрін жасайды. Іс аяқталды, сот шешім шығарды, бұл тақырыпты қайта-қайта көтерудің қажеті жоқ деп ойлаймын», - деді ол.
Сондай-ақ ол желіде тараған түрлі өсек-аяңдардан хабардар екенін атап өтті.
"Баспасөз қызметінің қызметкерлері маған желіде тұрғындардың түрлі пікірлер жазғанын көрсетіп жатыр. Олар “осы адамның (Берденов туралы) келуімен қала жарқырап кетті” деп жазған. Бірақ олай емес, ол кезде ол қызметке келгеніне бір айдан аз ғана уақыт болған еді, жұмысына енді ғана кірісіп жатқан. Одан кейін не болғанын өздеріңіз білесіздер", - деді әкім.
Журналистің Берденовпен арадағы қарым-қатынасы туралы сұрағына әкім қысқа ғана жауап берді.
"Өте жақсы", - деді ол.
Кейін басқа журналист осы қарым-қатынастың мәнін сұрағанда, әкім былай деді.
"Біз жақын емеспіз. Арамызда тек жұмыс бабындағы қатынас болды. Ол бірнеше саланы қадағалаған менің орынбасарым болды, жұмысқа енді ғана кірісіп жатқан еді".
Сыздықбековтың айтуынша, Берденов қызметінен өз еркімен кеткен.
2025 жылдың 21 сәуірі кешке Шымкент әкімдігі ғимаратының жанында белгісіз ер адам әкімнің орынбасары Руслан Берденовке оқ атқан еді. Шенеунік жарақат алып, ауруханаға жеткізілді.
Оқиғадан кейін желіде шабуыл жасалған жерден түсірілген ықтимал видео тарады.
Кейін анықталғандай, оқ атқан адам 31 жастағы Ернар Жиенбай. Оған Қылмыстық кодекстің 24-бабы 3-бөлігі және 99-бабы 1-бөлігі бойынша "Кісі өлтіруге оқталу" айыбы тағылды.
20 тамызда Ернар Жиенбай кінәлі деп танылып, орта қауіпсіздік мекемесінде 9 жылға бас бостандығынан айырылды. Сондай-ақ сот оны жәбірленушіге 30 АЕК (2025 жылы 117 960 теңге) өтемақы төлеуге міндеттеді.
9 қазанда Шымкенттің қылмыстық істер жөніндегі апелляциялық алқасы үкімді өзгеріссіз қалдырды.
