11 желтоқсан, 2025
Орталық коммуникациялар қызметінде өткен брифингте Шымкент әкімі Ғабит Сыздықбеков қаладағы жұмыс нәтижелері туралы есеп берді. Жиын барысында журналист Бақытжан Көпбаев әкімге ерекше алғысын білдірді, деп хабарлайды kznews.kz
Бақытжан Көпбаев мәслихат залында: «Сіз қызметке келгелі Шымкент айтарлықтай дамып келеді. Қазір халық арасында “қаланы дамытуға үлкен үлес қосқан әкіміміз ауысып кетпей ме?” деген сұрақ жиі айтылады», – деді.
Ғабит Сыздықбеков өз сөзінде бұрынғы әкімдер де қаланың дамуына аянбай еңбек еткенін атап өтті. Сондай-ақ кадрлық мәселелерге қатысты соңғы шешімді Мемлекет басшысы қабылдайтынын еске салды.
«Қызметте қалу-қалмау мәселесін Президент шешеді. Ал мен қазір қолымнан келгенше қаланың дамуы үшін жұмыс істеп жүрмін», – деді ол.
Журналист брифинг соңында: «Сізді әкім етіп сайлаған Аллаға және Президентке алғыс айтамын», – деп өз ризашылығын білдірді.
