Айыпталушы — әкімдікке қарасты мекеменің бұрынғы басшысы
Тергеу мәліметінше, айыпталушы Ернар Жиембай — “Тұрғын үй Шымкент” ЖШС-нің бұрынғы директоры, екі баланың әкесі. Ол Шымкент қаласы әкімінің орынбасары Руслан Берденовке қызметінен босатылғаннан кейін, кек алу мақсатында оқ атқан.
Қылмыс қалай жасалды?
Айыптау актісіне сәйкес, сол күні әкім орынбасарының бұйрығымен жұмыстан шығарылған Жиембай қатты күйзеліп, спирттік ішімдік сатып алып ішкен. Кейін үйіне барып, аңшылық мылтығын алып, әкімдік ғимаратына бет алады. Көлігінде күтіп отырып, әкім орынбасарын көрген сәтте бес рет оқ атқан.
Берденов жерге құлаған кезде, күдікті алтыншы рет оқ атуға оқталған, бірақ бұл сәтте әкімнің жүргізушісі Жиембайды көлікпен қағып тоқтатқан.
Жәбірленуші аман қалды
Руслан Берденов көп қан жоғалтқан. Дәрігерлер оны аман алып қалу үшін бес сағаттан астам уақыт ота жасап, өмірі үшін күресті. Қазір шенеунік сот процесіне қатысып, бірінші болып куәлік береді деп күтілуде.
Қызғаныш па, әлде кек пе?
Бастапқыда қылмыстың себебі қызғаныш делінген. БАҚ-та тараған ақпаратқа сәйкес, күдікті оқ атып жатып: “Ол менің әйеліме тиісті” деп айқайлағаны айтылған. Алайда Жиембайдың жұбайы бұл айыпты жоққа шығарып, әкім орынбасарын танымайтынын мәлімдеген.
Айыпталушының әкесі — бұрынғы прокурор Жиембай Пралиев — келінінің бұл іске қатысы жоқ екенін айтып, оны араластырмауды сұраған.
Сот істің мән-жайын анықтайды
Қазір сот отырыстары басталып, барлық дерек-дәйектер тыңдалуда. Айыпталушының әрекетіне байланысты үкім алдағы уақытта шығарылады.
