Бүгін, 10:33
Қырғызстанның Манас қаласында ауыр жарақат алған жас жігіт Жалал-Абад облыстық ауруханасына жеткізілді, деп хабарлайды kznews.kz.
Дәрігерлердің мәліметінше, науқастың тілінің ұшы мен төменгі ернінің бір бөлігі зақымданған. Ерекшелігі – тілінде ұрып-соғуға тән көгеру белгілері анықталмаған. Жараланған жігіт ауруханаға өз бетімен келген.
Кейін белгілі болғандай, жарақатты 18 жастағы қыз келтірген. Оның айтуынша, бұл оқиға сүйісу кезінде байқамай қатты тістеп алу салдарынан болған.
Бас және жақ-бет хирургия бөлімінің меңгерушісі Алмаз Абдылдаевтың сөзінше, жігіт қабылдау бөліміне ауыз қуысынан қатты қан кетіп түскен. Дәрігерлер дереу ота жасап, зақымданған жерлерді тігіп берген.
Мамандардың бағалауынша, тілдің шамамен 30 пайызы, ал төменгі еріннің 40 пайызы жұлынып кеткен.
"Мұндай жарақат қатты тістеу салдарынан болуы мүмкін. Нақты қалай болғанын тиісті органдар анықтайды. Қазір науқастың жағдайы тұрақты, ол сөйлей алады және өздігінен тамақтанып жатыр", – деді дәрігер.
