Бүгін, 12:16
Ресейге жұмыс істеуге барып, алданғаннан кейін мәжбүрлі түрде соғыс аймағына жіберілген қазақстандық азаматтар елге аман-есен оралды. Бұл туралы заңгер Мейірман Шекеев мәлімдеді, деп хабарлайды kznews.kz.
Заңгер әлеуметтік желідегі парақшасында азаматтардың елге оралуына көмектескен адамдарға алғыс айтты.
«Бұл қуанышты сөзбен жеткізу мүмкін емес. Әуелі Алла, одан соң, әрине, Мемлекет басшысы Қасым-Жомарт Кемелұлы Тоқаевқа, Сыртқы істер министрлігінің осы іске атсалысқан әрбір өкіліне және осы балалардың елге аман-есен оралуына титтей де болса себепші болған барша азаматтарға ата-аналардың атынан және өз атымнан шын жүректен алғысымды білдіремін», – деп жазды ол.
Бұған дейін Украинадағы соғыс аймағына тап болған 13 қазақстандықтың елге оралуға дайындалып жатқаны хабарланған еді.
