Бүгін, 11:23
Республикалық референдум өткен күні Қазақстанда сотқа екі талап арыз түсті, деп хабарлайды kznews.kz.
Орталық референдум комиссиясының дерегінше, арыздардың бірі Ақтөбеде зағип жандарға арналған бюллетеньдегі брайль қарпінің оқылмауына, екіншісі Астанада бақылаушының учаскеден шығарылуына қатысты болған. Екі іс те сотта қаралып, талап арыздар қайтарылған.
Референдум күні ел бойынша 47 мыңнан астам бақылаушы жұмыс істеген, олардың тек алтауы ғана учаскеден шығарылған. Соның бірі сотқа жүгінгенімен, сот бұл шешімді заңды деп таныды.
Жалпы азаматтардан 35 түрлі сұрақ түсіп, көбіне дауыс беру тәртібі мен заң талаптарына қатысты өтініштер Астана мен Алматыда тіркелген. Референдум қорытындысы бойынша Конституцияға енгізілген өзгерістер қабылданды.
