24 маусым, 2025
Зардап шеккен Руслан Жолмағанбетовтың жұбайы Анаргүл Мұғзарованың айтуынша, шабуыл жасаған — күйеуінің бұрын бірге жұмыс істеген танысы. Ол Русланға 30 мың теңге қарыз болған.
«Күйеуім оны үйдің маңынан көріп қалып, қарызын қайтаруын сұраған. Сол сәтте әлгі адам Русланға жұдырық ала жүгіріп, соққы жасады», — дейді Анаргүл.
Ауыр соққы салдарынан ер адамның өңеші зақымданып, медиастинит (кеуде қуысындағы қабыну) дамыған. Қазір ол жасанды тыныс алу аппаратына қосылып, дәрігерлер бақылауында жатыр.
Анаргүлдің айтуынша, бұл жағдай балалардың көз алдында болған. Қызына тырыспа ұстап, ұлы қатты шошынып қалған — оның жүрегінде ақауы бар.
Полиция бұл дерек бойынша 18 маусым күні қылмыстық іс қозғаған. Күдікті — 1985 жылы туған азамат — ұсталып, сараптама тағайындалды. Соңғы шешім оның нәтижесіне байланысты қабылданады.
