18 қазан, 2025
Жәбірленуші түрлі жарақат алып, оның жақ сүйегі мен мұрны сынған, сондай-ақ миы шайқалған. Ол ауруханаға жеткізіліп, дәрігерлер ота жасап, жақ сүйегін металл пластиналармен бекітті.
Әлеуметтік желілерде жасөспірімдердің өз қатарласын мектеп әжетханасында соққыға жығып жатқаны бейнеленген видео тарағаннан кейін оқиғаға қатысты қылмыстық іс қозғалды.
Қызылорда облыстық Полиция департаментінің хабарлауынша, бір топ адамның қатысуымен болған бұзақылық дерегі бойынша барлық күдікті жасөспірім ұсталып, полиция бөліміне жеткізілді.
«Қазір оқиғаның барлық мән-жайын анықтау бойынша тергеу амалдары жүріп жатыр. Сондай-ақ кінәлі жасөспірімдердің ата-аналары балаларды тәрбиелеу жөніндегі міндеттерін орындамағаны үшін жауапкершілікке тартылады», – делінген ведомствоның ресми хабарламасында.
Полиция бұл дерек бойынша істі кәмелетке толмағандар ісі жөніндегі комиссияның қарауына жіберген. Комиссия осындай жағдайлардың алдын алу және себептерін жою мақсатында қосымша шаралар қабылдайды.
