Бүгін, 12:15
Ахмет Байтұрсынұлы атындағы Қостанай өңірлік университетінің студенттері еліміздегі алғашқы студенттік жарыс болидін таныстырды, деп хабарлайды kznews.kz. Ғылым күні қарсаңында өткен салтанатты шарада бірегей көлік көпшілікке алғаш рет ұсынылып, көрермендердің зор қызығушылығын тудырды.
Жоба университет жанындағы Озық машина жасау орталығында жүзеге асқан. Болидтің басты ерекшелігі – оның барлық бөлшегі студенттердің өз қолымен, нөлден бастап жасалған. Жас инженерлер идеяны әзірлеуден бастап, техникалық есептеулер жүргізу, жобалау, құрастыру және сынақтан өткізу кезеңдерінің барлығын өздері орындаған.
Мамандардың айтуынша, бұл жоба тек оқу үдерісінің бір бөлігі емес, толыққанды инженерлік жұмыс саналады. Мұндай деңгейдегі студенттік жарыс көліктері Қазақстанда сирек кездеседі және отандық техникалық білім беру жүйесінің әлеуетін айқын көрсетеді.
Жобаның тағы бір ерекшелігі – студенттің бір мезетте әрі инженер, әрі жүргізуші рөлін атқаруы. Бұл тәсіл олардың тәжірибелік дағдыларын дамытып, нақты өндірістік міндеттерді шешуге дайындығын арттырады.
Аталған бастама өңірдегі инженерлік білім мен ғылымды дамыту бағытындағы нақты нәтижелердің бірі болып саналады. Сонымен қатар, бұл жоба жас мамандардың шығармашылық және техникалық мүмкіндіктерін айқын көрсетеді.
