Бүгін, 17:32
Өскемендегі Казцинк кәсіпорнында болған жарылыстың себептері маусым айында жариялануы мүмкін. Бұл туралы Мәжіліс кулуарында Еңбек және халықты әлеуметтік қорғау бірінші вице-министрі Ербол Тұяқбаев мәлімдеді, деп хабарлайды kznews.kz.
Оның айтуынша, апатқа қатысты тергеу әлі жалғасып жатыр. Жарылыстың нақты неден болғанын анықтау үшін зерттеуге жоғары оқу орындарының ғалымдары да тартылған.
«Бұл іске жан-жақты қарап жатырмыз. Жарылыстың қалай болғанын толық түсіну үшін университет ғалымдарын қостық. Тергеу нәтижелері міндетті түрде БАҚ-қа жарияланады. Меніңше, қорытынды маусым айында белгілі болады», – деді вице-министр.
Еске салайық, 5 мамыр күні таңертең Өскемендегі зауыт аумағында жарылыс болып, аспанға қою ақ түтін көтерілген еді. Оқиға салдарынан үш адам қаза тауып, бірнеше жұмысшы ауыр күйік алған.
