Бүгін, 11:48
Қазақстан туралы әлеуметтік желіде арандатушылық сипаттағы жазбалар жариялаған шетел азаматына қатысты сот шешімі орындалды. Г.К. есімді азаматша әкімшілік жауапкершілікке тартылып, кейін Қазақстан аумағынан шығарылған, деп хабарлайды kznews.kz.
Құқық қорғау органдарының мәліметінше, шетелдік азаматша тікелей эфир барысында Қазақстан мен қазақ халқына қатысты әдепке қайшы және арандатушылық сипаттағы пікірлер айтқан. Ол елді өзге мұсылман мемлекеттерімен салыстырып, халықтың зияткерлік деңгейіне қатысты кемсітетін сөздер қолданған.
Әлеуметтік желіде тараған эфир барысында әйелдің айтқандары қоғамның наразылығын туғызған. Оның кейбір пікірлері Қазақстан азаматтарының ар-намысы мен қадір-қасиетіне тиетін сипатта болғаны айтылды.
Іс материалдары сотта қаралып, шетелдік азаматтың әрекетіне құқықтық баға берілген. Нәтижесінде оған әкімшілік шара қолданылып, Қазақстан Республикасының аумағынан мәжбүрлеп шығару туралы шешім қабылданған.
