Бүгін, 18:03
Қазақстанда жыныстық сипаттағы қылмыстық істерді тергеу жұмыстары әйел мамандарға жүктеледі. Бұл туралы Мәжілісте өткен «Сталкинг пен некеге мәжбүрлеудің алдын алу» тақырыбындағы дөңгелек үстелде Ішкі істер министрінің орынбасары Санжар Әділов мәлімдеді, деп хабарлайды kznews.kz.
Оның айтуынша, бұл тәсіл зорлық-зомбылық құрбандарының психологиялық жүктемесін азайтып, тергеу процесін барынша қолайлы етуге бағытталған.
Сондай-ақ вице-министр Қылмыстық кодекске енгізілген «некеге тұруға мәжбүрлеу» бабына түсініктеме берді. Заң бойынша мұндай қылмыстың құрбаны ретінде әйелдермен қатар ер азаматтар да танылуы мүмкін. Қылмыстық іс қозғау үшін күш қолдану, қорқыту немесе қысым көрсету фактілері дәлелденуі қажет. Ал мұндай белгілер болмаған жағдайда іс азаматтық-құқықтық тәртіппен қаралады.
Бұдан бөлек, Ішкі істер министрлігі сталкингке қатысты жауапкершілікті күшейтуді ұсынып отыр. Ведомствоның мәліметінше, кейбір азаматтар жазасын өтегеннен кейін де жәбірленушілерді аңдуын және мазалауын жалғастырған. Осыған байланысты заңнамаға «жүйелі түрде қайталау» ұғымын енгізу көзделген. Тиісті түзетулер қазір Мәжіліс қарауында жатыр.
