Вице-министрдің айтуынша, қазіргі қолданыстағы заңнама жасанды интеллектіні министрлер кабинеті мүшесі ретінде бекітуге мүмкіндік бермейді.
«Өздеріңіз білесіздер, Қазақстан әлемде алғашқылардың бірі болып Жасанды интеллект министрлігін құрды. Алайда заң бойынша министр немесе вице-министр лауазымына тек жеке тұлға ғана тағайындала алады. Сондықтан әзірге жасанды интеллектіні үкімет мүшесі ету жоспарда жоқ», – деді Мұсалиев Үкімет үйінде өткен баспасөз мәслихатында.
Ол бұл бағыттағы бастамалар әзірге тәжірибелік деңгейде ғана қарастырылып жатқанын, заңнамалық тұрғыдан нақты тетіктер қаралмағанын да атап өтті.
Айта кетейік, бұған дейін Албанияда әлемдегі алғашқы жасанды интеллект министрі тағайындалғаны туралы ақпарат тараған еді. Сарапшылар бұл шешімді жаһандық технологиялық басқарудағы жаңа кезеңнің бастауы деп бағалаған.
