«KEGOC» АҚ Қазақстандағы жаппай жарықтың өшуіне қатысты оқиғаның хронологиясын жариялады, деп хабарлайды kznews.kz.
14 тамызда сағат 14:37-де Қырғызстандағы Тоқтоғұл ГЭС-інде екі гидрогенератор ажыратылған. Соның салдарынан Қазақстанның Бірыңғай электр энергетикалық жүйесіндегі (БЭЖ) Солтүстік–Шығыс–Оңтүстік транзитіне шамадан тыс жүктеме түскен.
Нәтижесінде Қазақстанның Оңтүстік аймағы елдің БЭЖ-інен және Орталық Азияның біртұтас электр энергетикалық жүйесінен — Қырғызстан, Өзбекстан және Тәжікстан энергетикалық жүйелерінен ажыраған.
Осының салдарынан Алматы, Жамбыл, Түркістан, Қызылорда және Жетісу облыстарында тұтынушылар электр қуатынсыз қалды. Сонымен қатар Қазақстан БЭЖ-інің Солтүстік аймағындағы Қарағанды, Ұлытау және Абай облыстарында да электр энергиясы өшті.
«KEGOC» мәліметінше, сағат 14:47-де Қарағанды, Ұлытау және Абай облыстарындағы тұтынушылардың электрмен жабдықталуы толық қалпына келтірілді.
16:26-да Алматы және Жетісу облыстарында, ал 16:34-те Жамбыл, Түркістан және Қызылорда облыстарында электр энергиясы толық берілді.
«Технологиялық бұзылудың себептері арнайы комиссиямен тексеріледі», – делінген «KEGOC» мәлімдемесінде.
Жаппай электр жарығының өшуі Қырғызстан, Тәжікстан және Өзбекстанда да тіркелді.