Бүгін, 10:45
Жамбыл облысындағы "Қарасу" автомобиль өткізу пунктінде Қырғызстан бағытына бет алған 400-ге жуық жүк көлігі жиналып қалды, деп хабарлайды kznews.kz.
Мемлекеттік кірістер комитеті бұл туралы сенбі, 29 тамызда Telegram-арнасында мәлімдеді.
Комитет көлік ағынының артуы уақытша сипатқа ие екенін түсіндірді. Жүк көліктерінің кезекке тұруына халықаралық жүк тасымалы көлемінің маусымдық өсуі және Қырғызстан аумағында жүк көліктерінің қозғалысына енгізілген температуралық шектеулер әсер еткен.
"Мемлекеттік кірістер комитеті мүдделі мемлекеттік органдармен бірлесіп жағдайды тұрақтандыру және өткізу пунктінің өткізу қабілетін арттыру бойынша шаралар қабылдап жатыр. Осы мақсатта өткізу пунктіндегі жұмыс күшейтілді. Ішкі істер органдарымен бірлесіп көлік ағынын реттеу және көліктердің бір бөлігін жақын маңдағы өткізу пункттеріне бағыттау ұйымдастырылды", — делінген хабарламада.
Қазақстан тарапы жағдайды бағалау және алдағы шараларды келісу үшін Қырғызстанның құзыретті органдарымен байланыс орнатып жатқанын атап өтті.
Тасымалдаушылар мен жүргізушілер үшін мессенджерлерде арнайы ақпараттық арна жұмыс істейді. Онда өткізу пункттеріндегі ахуал және ықтимал балама бағыттар туралы өзекті мәліметтер жарияланып отырады. Сонымен қатар шекара бекетінің алдында жүргізушілерге түсіндіру жұмыстары жүргізіліп жатыр.
Мемлекеттік кірістер комитеті тасымалдаушыларды бағытты жоспарлау кезінде қазіргі жағдайды ескеруге шақырды.
