Бүгін, 13:31
Жаңа оқу жылынан бастап Қазақстан мектептерінде смартфон қолдануға қатысты бірыңғай талаптар енгізіледі. Оқу процесі кезінде оқушыларға телефон пайдалануға болмайды, деп хабарлайды kznews.kz.
Бұл туралы 18 тамызда Оқу-ағарту министрінің бірінші орынбасары Шынар Ақпарова мәлімдеді. Оның айтуынша, министрлік осыған қатысты жаңа ережелерді әзірлеген.
Алайда смартфон қолдануға толық тыйым салынбайды. Егер телефон оқу тапсырмасын орындау үшін қажет болса және оны пайдалану оқу бағдарламасында қарастырылса, мұғалім оқушыларға гаджетті қолдануға рұқсат бере алады.
Үзіліс кезінде телефон қолдануға бола ма?
Бұл мәселеде барлық мектепке ортақ талап болмайды. Министрлік жалпы ережелерді белгілейді, ал үзіліс кезінде смартфон қолдану тәртібін әр мектеп өзі анықтайды.
«Министрлік жалпы талаптарды белгілейді, ал үзіліс кезінде телефондарды пайдалану тәртібін әр мектеп өз бетінше анықтайды. Бұл ережелер білім беру ұйымының ішкі тәртібінде бекітіледі», – деді Шынар Ақпарова.
Яғни мектеп оқушыларға үзіліс кезінде телефон пайдалануға рұқсат бере алады немесе оған шектеу қоюы мүмкін.
Оқушылар смартфондарын қайда қалдырады?
Телефондарды сабақ кезінде сақтау тәртібі де барлық мектепте бірдей болмайды. Министрлік бірнеше нұсқаны қарастырып жатыр. Мысалы, оқушы смартфонын сөмкесінде қалдыруы, сыныпта немесе арнайы жәшікте сақтауы мүмкін.
Телефондарды сабақ кезінде кім және қай жерде сақтайтынын мектептің өзі өзінің жағдайына қарай белгілейді.
Телефон қолдануға қатысты талаптар не үшін күшейтіледі?
Қазақстан мектептерінде смартфон қолдануға қатысты шектеулер бірнеше жылдан бері талқыланып келеді. 2024 жылы заңнамаға оқушылардың оқу процесі кезінде мобильді телефон пайдалануына шектеу енгізетін норма қосылған. Тек оқу мақсатында гаджет қажет болған жағдайда ғана ерекшелік қарастырылған.
Ал 2026 жылы депутаттар бұл шектеуді сабақпен ғана шектемей, бүкіл оқу күніне, соның ішінде үзілістерге де қолдануды ұсынды. Бастаманың негізгі себептерінің бірі ретінде кибербуллинг қаупін азайту және балалардың қажетсіз контентке қол жеткізуіне жол бермеу қажеттілігі айтылды.
