Бүгін, 13:34
«Қазақмыс» өндірістік нысандарды энергиямен тұрақты қамтамасыз ету үшін жеке газ поршеньді электр станцияларын салу мүмкіндігін қарастырып жатыр. Компания Жезқазғандағы өндіріс алаңында жаңа энергия көздерін іске қосу арқылы энергетикалық тәуелсіздікті арттырып, энергия тиімділігін күшейтуді көздейді, деп хабарлайды kznews.kz.
«Қазақмыс» компаниясы энергетикалық тәуелсіздікті арттыру стратегиясы аясында Borusan Cat Қазақстан өкілдерімен кездесу өткізіп, өндірістік нысандар аумағында газ поршеньді электр станцияларын салу мәселесін талқылады.
Жоба табиғи газды пайдалану мен когенерация технологиясын енгізуді көздейді. Бұл жүйе электр және жылу энергиясын қатар өндіруге мүмкіндік береді. Соның нәтижесінде кәсіпорындардың энергия тиімділігі артып, сыртқы желілерге түсетін жүктеме азаяды.
Қазіргі уақытта «Қазақмыс» бірнеше халықаралық өндіруші мен интегратор ұсынған технологияларға салыстырмалы талдау жүргізуде. Компания үшін негізгі басымдық – өндірістің тұрақтылығын қамтамасыз ететін әрі ұзақ мерзімде өнімнің өзіндік құнын тиімді басқаруға мүмкіндік беретін автономды энергия жүйесін қалыптастыру.
«Қазақмыс» Тобы Басқарма төрағасы Руслан Өскенәлідің айтуынша, технологиялық серіктесті таңдау кезінде жабдықтың тиімділігімен қатар, сервистік қолдау мен қызмет көрсетуді жергіліктендіру мүмкіндігі де ескеріледі.
Кездесу барысында тараптар Жезқазған мыс балқыту зауыты аумағында қосымша техникалық аудит жүргізу мүмкіндігін де қарастырды. Зерттеу нәтижелері болашақ жеткізушіні анықтау және құрылыс-монтаж жұмыстары бойынша түпкілікті шешім қабылдауға негіз болмақ.
