Бүгін, 12:44
«Қазақмыс» ғылымды тек зертханамен шектемей, оны тікелей өндіріс үдерісіне енгізуді көздеп отыр. Ғылым қызметкерлері күні қарсаңында компания аясында жаңа ірі жоба іске қосылуда, деп хабарлайды kznews.kz.
Жаңа бастама аясында әр қызметкердің ұсынысы нақты өндірістік шешімге айналуы мүмкін. Бұл тек идея жинаумен шектелмейді — жүйе жұмысшылардың тәжірибесін ғылыми тәсілмен ұштастырып, толыққанды инновациялық орта қалыптастыруға бағытталған. Яғни, кез келген ұсыныс алдымен сараптамадан өтіп, ғылыми тұрғыда зерттеледі, кейін өндірістік жағдайда сынақтан өткізіледі.
Жобаның жұмыс істеу тәртібі бірнеше кезеңнен тұрады: ең алдымен идеяның ғылыми негізі бағаланады, одан кейін арнайы кеңестің қарауына жіберіледі. Соңғы кезеңде ұсыныс өндірісте тексеріліп, тиімділігі дәлелденген жағдайда жүзеге асырылады. Үздік бастамалар патенттеліп, авторлық құқықпен қорғалады.
Бұл тәсілдің нәтижелілігі бұған дейін де байқалған. Мәселен, «Қазақмыс Смэлтинг» кәсіпорнында 1 жыл 8 ай ішінде 500-ге жуық идея ұсынылып, оның 12 пайызы іске асқан. Соның арқасында компания шамамен 3 миллиард теңге көлемінде экономикалық тиімділікке қол жеткізген.
Енді осы тәжірибе бүкіл «Қазақмыс» тобына енгізілмек. Жобаның басты мақсаты — ғылым мен өндірісті ұштастырып, қауіпсіз әрі тиімді жұмыс жүйесін қалыптастыру.
