Бүгін, 09:24
Қазақмыс компаниялар тобында жұмысшылардың өмірі мен денсаулығын қорғауға және өндірістегі жазатайым оқиғаларды болдырмауға бағытталған 2026-2028 жылдарға арналған өнеркәсіптік қауіпсіздікті трансформациялау стратегиясы бекітілді, деп хабарлайды kznews.kz.
Қазақмыс корпорациясының басқарма төрағасы Руслан Өскенәлінің жетекшілігімен өткен стратегиялық сессияға басқарма мүшелері, өндірістік филиалдардың басшылары, техникалық сарапшылар мен JMJ Associates халықаралық компаниясының кеңесшілері қатысты.
Жиын барысында басқарма төрағасы жұмыскерлердің өміріне қауіп төнген жағдайда жұмыс істеуге мүлдем жол берілмейтінін мәлімдеді.
«Өнеркәсіптік қауіпсіздік біздің бірінші кезектегі басымдығымыз, ал өлімге әкелетін жазатайым оқиғаның алдын алу негізгі міндет. Қауіпсіздік талаптары бұлжытпай сақталған жағдайда ғана өндірістік жоспар орындалуы мүмкін. Осы мақсатта біз басқарушылық тәртіпті күшейтіп, басқарудың бірыңғай жүйесін қалыптастырып жатырмыз. Қауіпсіздік техникасы бойынша орталық комитет құрылып, жауапкершілік барлық деңгейде бекітіледі. Біздің міндет қабылданған шешімдердің күнделікті жұмыста орындалуын қамтамасыз ету, ал жұмыскерлердің өмірі мен денсаулығына қатысты мәселеде ешқандай ымыраға жол жоқ», – деді Руслан Өскенәлі.
Жаңа құжатты еңбекті қорғау жөніндегі басқарушы директор Жанбек Есмахановтың жетекшілігімен арнайы жұмыс тобы әзірлеген.
Бұл бағытта ішкі аудит пен халықаралық сарапшылардың қатысуымен тәуелсіз зерттеу жүргізіліп, қолданыстағы жүйеге кешенді баға берілді және трансформацияның негізгі бағыттары айқындалды. Нәтижесінде нөлдік жарақаттану қағидатына негізделген стратегия бекітіліп, ол тәуекелдерді басқару жүйесін жетілдіру мен қауіпсіздік саласындағы көшбасшылықты дамытуды қамтиды.
Осылайша компания жұмыскерлердің өміріне басымдық беретін жаңа басқару моделіне көшпек.
Осы шаралар аясында компанияда 2026 жыл «Қауіпсіздік жылы» болып жарияланды. Бұл кезеңде басқару жүйесін реттеуге, сенімді талдауды қалыптастыруға және тиімділіктің озық көрсеткіштерін енгізуге ерекше назар аударылады.
Стратегияны іске асыру үшін тоқсан сайын жиналатын өнеркәсіптік қауіпсіздік және еңбекті қорғау жөніндегі орталық комитет құрылып, өндірістік активтер деңгейінде тәуекелдерді жедел басқаруға бағытталған ай сайынғы комитет отырысының тәжірибесі енгізіліп жатыр.
Құжатты іс жүзінде жүзеге асыру барысында аса қауіпті тәуекелдерді бақылаудың бірыңғай стандарты бекітіліп, қауіпсіздік талаптары барлық бизнес үдерістерге, оның ішінде мердігер ұйымдармен жұмыс істеу барысына да интеграцияланады. Сонымен қатар тәуекелдерді азайту мақсатында жабдықтарды жаңартуға және өндірістік активтердің сенімділігін арттыруға бағытталған инвестицияларға ерекше мән берілмек.
Енді аса қауіпті тәуекелдерді бақылау шараларын толық орындау басшылар үшін негізгі тиімділік көрсеткішіне айналады және бұл қадам оқиғаларға жай ғана әрекет етуден олардың алдын алуға көшуге мүмкіндік береді.
Стратегияның ұзақ мерзімді мақсаты жарақаттану деңгейін кезең-кезеңімен төмендетіп, өліммен аяқталатын оқиғаларды толығымен жою және компанияның күнделікті қызметіне енген тұрақты қауіпсіздікті басқару жүйесін қалыптастыру болып табылады.
