Бүгін, 09:35
Қасым-Жомарт Тоқаев Владимир Путинмен кездесу өткізіп, екі ел арасындағы ынтымақтастықтың өзекті мәселелерін талқылады, деп хабарлайды kznews.kz.
Кездесу барысында мемлекет басшылары саяси, экономикалық және гуманитарлық байланыстарды қамтитын екіжақты күн тәртібін қарастырды. Қасым-Жомарт Тоқаев Владимир Путиннің алдағы Қазақстанға мемлекеттік сапарына дайындыққа ерекше мән берілетінін айтты.
Қазақстан Президенті ресейлік әріптесіне жылы қабылдауы үшін алғыс білдіріп, Ресей халқын Ұлы Жеңістің 81 жылдығымен құттықтады. Ол бұл мерекенің тарихи әрі рухани маңызы зор екенін атап өтіп, соғыста қаза тапқан батырларды еске алудың маңызын айтты.
Мемлекет басшысы Қазақстанда бүгінде Ұлы Отан соғысына қатысқан 57 ардагердің ғана қалғанын айтып, олардың ерлігі ешқашан ұмытылмайтынын жеткізді.
Сонымен қатар Тоқаев Қазақстан мен Ресей арасындағы экономикалық байланыстардың нығайып келе жатқанын атап өтті. Оның айтуынша, Ресей соңғы бес жылда Қазақстан экономикасындағы басты инвесторлардың бірі болып отыр. Биыл екі ел арасындағы тауар айналымы 30 миллиард доллардан асады деген болжам бар.
Президент гуманитарлық саладағы ынтымақтастыққа да тоқталып, «Сириус» мектептері Астана, Алматы және өзге өңірлерде ашылғанын айтты. Сондай-ақ туризм саласындағы байланыстардың да белсенді дамып жатқанын жеткізді. Былтыр Қазақстанға ең көп турист келген ел ретінде Ресей бірінші орын алған.
