Бүгін, 19:05
Еліміздің Экология және табиғи ресурстар министрлігі Қашаған кен орнындағы экологиялық талаптардың бұзылуына байланысты NCOC компаниясынан өндіріп алуы тиіс 2,3 трлн теңге айыппұлды мәжбүрлеп өндіріп алу рәсімі уақытша тоқтады.
Жалпы, Әділет министрлігінің атқарушылық іс жүргізу жүйесіндегі дерекке сәйкес, өндіріп алу туралы іс 7 қыркүйекте тоқтатылған екен. Ал бұл істің негізі Каспий теңізіндегі Қашаған кен орнында күкіртті рұқсат етілген көлемнен артық сақтау мәселесіне қатысты болған. Экологиялық тексеру нәтижесінде Қазақстан тарапы NCOC-ке және оның мердігерлеріне ірі көлемде айыппұл салған еді.
Алайда, мәселе енді Қазақстанның ішкі атқарушылық өндірісімен ғана шектелмейді. NCOC айыппұлға халықаралық арбитражда дау айтып отыр. 16-шілдеде UNCITRAL арбитражы Қазақстан билігіне арбитраж шешімі шыққанға дейін айыппұлды мәжбүрлеп өндіріп алуға тыйым салатын қамтамасыз ету шарасын қабылдаған болатын.
Дегенмен, қазіргі шешімді Қазақстанның 2,3 трлн теңгеден бас тартуы деп түсінуге болмайды. Бұл өндіріп алу процесінің уақытша тоқтауы. Айыппұлдың түпкілікті тағдыры халықаралық арбитраждағы даудың нәтижесіне тәуелді болмақ.
Айтпақшы, NCOC құрамына Shell, TotalEnergies, ExxonMobil және CNPC секілді ірі халықаралық компаниялар кіреді.
