10 желтоқсан, 2018
Қазақстандық кәсіпқой боксшы Қанат Исламның шаршы алаңға қашан оралатыны белгілі болды.
Боксшы бұл туралы отандық vesti.kz сайтына берген сұхбатында мәлімдеген.
«Жарақатымнан жақында ғана айықтым. Енді-енді жаттығуға кірісіп жатырмын. Наурыз айында кәсіпқой бокс шаршы алаңына қайта ораламын. Қазіргі таңда ұйымдастыру жұмыстарымен айналысып жүрмін. 13-16 желтоқсан аралығында Бақтияр Артаевпен бірге «Астана Арландары» жанкүйерлері арасында турнир өткіземіз. Біздің мақсатымыз – отандық кәсіпқой боксты дамыту» депті Ислам.
Еске салсақ, боксшы өткен жылдың 9 қыркүйегінен бері рингке шыққан жоқ. Ол соңғы рет Астанада канадалық Брэндон Кукты жеңген болатын. Одан кейін Қанат 23 маусымда Лос-Анджелесте жұдырықтасуы тиіс еді. Алайда жарақат алып, аталған кездесу кейінге қалдырылды.
Абай Аймағамбет
