Бүгін, 20:12
Ұлттық қауіпсіздік комитетінің Сыбайлас жемқорлыққа қарсы іс-қимыл қызметі биылғы маусым айындағы жұмыс қорытындысын жариялады.
Ресми мәліметке сәйкес, бір ай ішінде 125 сыбайлас жемқорлық құқық бұзушылығы тіркелген. Оның ішінде ең көп таралғаны парақорлық болып отыр. Бұл санатқа 97 қылмыс тиесілі. Сонымен қатар 9 алаяқтық, 8 лауазымдық өкілеттіктерді теріс пайдалану, 7 жымқыру, 3 жалған қызмет жасау және 1 билікті асыра пайдалану фактісі анықталған.
Қылмыстық істер аясында 67 адам күдікті деп танылды. Есепті кезеңде 149 қылмыстық істің тергеуі аяқталып, оның 129-ы сотқа жолданған.
Аяқталған қылмыстық істер бойынша мемлекетке келтірілген залал көлемі 4,7 млрд теңгені құраған. Оның 2,1 млрд теңгесі бюджетке қайтарылды. Сондай-ақ құны 971,4 млн теңге болатын мүлікке тыйым салыныпты.
Тоқетері, құзырлы орган тарапынан сыбайлас жемқорлыққа қарсы іс-қимыл жұмыстары жалғаса береді.
