Бүгін, 09:26
Қазақстанның Тұңғыш президенті Нұрсұлтан Назарбаев "Хабар" арнасындағы "Штрихи к портрету" деректі фильмінде жиен немересі Айсұлтан Назарбаевтың қазасына қатысты естелігімен бөлісті, деп хабарлайды Dalanews.kz.
Фильмде Назарбаев үш қызынан тараған немерелері бар екенін айтып, 2020 жылы бір немересінен айырылғанын еске алған. Ол Айсұлтанның өзіне қатты ұқсайтынын және оның өмірден ерте кеткеніне өкінетінін жеткізді.
"Өкінішке қарай, биыл бір немеремді жоғалтып алдық. Ол маған өте ұқсайтын еді. Өз уақытынан ерте өмірден өтті", – деді Назарбаев деректі фильмде.
Сонымен қатар ол Айсұлтанның денсаулығы мен өмір салтына байланысты күрделі кезеңдер болғанын айтты. Назарбаевтың сөзінше, отбасы оны емдетуге тырысқан, Мәскеуде де, Лондонда да ем қабылдатқан. Алайда оның жағдайын толық бақылауда ұстау мүмкін болмағанын жеткізді.
"Оны ешқайда жібермесе де болар еді. Бірақ ұстап отыру мүмкін болмады. Ол бұл істің құлы болған, тоқтай алмады. Біз оны Мәскеуде емдедік, Лондонда да емдедік. Қайта шығып, қайта оралатын", – деді Нұрсұлтан Назарбаев.
Айсұлтан Назарбаев 2020 жылы өмірден өтті. Оның қазасы сол кезде қоғамда кең талқыланған еді. Ол Дариға Назарбаева мен Рахат Әлиевтің ұлы болатын.
"Штрихи к портрету" деректі фильмі Нұрсұлтан Назарбаевтың өмірі мен қызметіне арналған көпсериялы жоба ретінде ұсынылған. Онда оның отбасы, жеке өмірі, саяси жолы және бұрын көп айтыла бермеген естеліктері қамтылған.
