Бүгін, 22:08
Батыс Қазақстан облысында әлеуметтік желіде тараған видеоға байланысты қылмыстық іс қозғалды. Онда шетелде тұратын қазақстандық әйел жас кезінде зорлық-зомбылыққа ұшырағанын мәлімдеген, деп хабарлайды өңірлік полиция департаменті.
Әлеуметтік желіде жарияланған бейнеүндеуде әйел шамамен 30 жыл бұрын, 17–18 жас шамасында Батыс Қазақстан облысының шалғай ауылдарының бірінде төрт ер адамның тарапынан зорланғанын айтқан. Оның сөзінше, бұл оқиға ұзақ жылдар бойы жария етілмей келген.
Қазіргі уақытта әйелдің шетелде, нақтырақ айтқанда Вьетнамда тұратыны белгілі. Ол бейнежазбада Қазақстанға, Орал қаласына келіп, өзін зорлағандарды заң аясында жауапқа тартуға ниетті екенін жеткізген.
Аталған дерекке қатысты Батыс Қазақстан облысы полиция департаментінің баспасөз қызметі қылмыстық іс тіркелгенін растады.
Ведомство өкілдерінің мәліметінше, қазіргі уақытта оқиғаның барлық мән-жайын анықтауға бағытталған жедел-тергеу шаралары жүргізіліп жатыр. Құқық қорғау органдары ықтимал күдіктілерді анықтау, сондай-ақ оқиғаға қатысы бар тұлғаларды белгілеу бағытында жұмыс істеуде.
Сонымен қатар, құқық қорғау органдары мұндай істердің күрделілігіне байланысты уақыт факторының маңызы зор екенін атап өтеді. Алайда жәбірленушінің өтініші негізінде істің қайта қаралуы заң аясында мүмкін екені айтылды.
Қазіргі таңда Вьетнамда тұратын әйелдің жазбасына қатысты іс бақылауға алынып, тергеу жалғасып жатыр.
