Бүгін, 18:56
Алматы облысында туғаннан кейін бес күннен соң көз жұмған нәрестенің өлімі әлеуметтік желіде, соның ішінде Threads платформасында қызу талқыланып жатыр. Марқұм сәбидің туыстары қайғылы жағдайға медициналық қызметкерлердің салғырттығы себеп болды деп санайды, деп хабарлайды kznews.kz.
Әлеуметтік желі қолданушысы Бибінұрдың жазуынша, сәби дүниеге келу кезінде жарақат алған болуы мүмкін. Оның айтуынша, босану сәтінде әйелді медициналық зембілдің орнына мүгедектер арбасымен тасымалдаған, сол кезде нәрестеге зақым келуі ықтимал.
«Сол сәтте бала құлап кеткен. Кейін дәрігерлер ешқандай көмек көрсетпей, нәрестенің жағдайы жақсы деп анасына берген», – деп жазды ол.
Туыстарының айтуынша, келесі күні сәбидің жағдайы күрт нашарлап, емуден қалып, тыныс алуы қиындаған. Осыдан кейін нәресте басқа медициналық мекемеге жеткізіліп, шұғыл ота жасалған. Алайда дәрігерлер баланы аман алып қала алмаған.
Жақындарының сөзінше, кейінгі тексеру барысында нәрестенің бастапқыда жарақатпен дүниеге келгені айтылған.
Туыстар перзентхана тарапынан жауапкершілік толық мойындалмай, кінә босанған анаға аударылуға тырысып жатыр деп есептейді. Олар бұл істі құзырлы органдардың толық әрі жан-жақты тексеруін талап етпек.
Бибінұрдың айтуынша, кейбір дәрігерлер жағдайға байланысты келіп, кешірім сұрап, өз кінәсін ішінара мойындағаны да айтылған.
