Қазақстандық мұғалімдерге ата-аналардан келетін хабарламаларға кешкі сағат 18:00-ден кейін жауап бермеуге мүмкіндік берілуі мүмкін. Бұл туралы Оқу-ағарту министрі Жұлдыз Сүлейменова мәлімдеді, деп хабарлайды kznews.kz.
Министрдің айтуынша, ата-аналар чаттарында мұғалімдерге сұрақтарды жұмыс уақыты ішінде, яғни сағат 18:00-ге дейін қою ұсынылады. Ал одан кейін педагогтің жеке уақытына құрметпен қаралуы керек.
«Біздің ұстанымымыз нақты: ата-аналар чаттарында сағат 18:00-ге дейін сұрақтар қоюға болады деп есептейміз. Ал 18:00-ден кейін әр мұғалімнің жеке өмірі бар және оны құрметтеу қажет», – деді министр.
Сүлейменованың айтуынша, биыл «Педагог мәртебесі туралы» заңға тиісті өзгерістер енгізіліп, мұғалімнің сабақ кезіндегі және сабақтан тыс уақыттағы міндеттері, сондай-ақ мектеп пен оқу процесіне қатысты жауапкершілік аясы нақтыланады.
Яғни жаңа талаптар педагогтердің жұмыс пен жеке уақыт арасындағы шекарасын нақтылауға бағытталмақ.