Бүгін, 15:02
Мәжіліс депутаттары бірінші оқылымда педагогтердің әкімшілік жүктемесін азайтуға бағытталған заң жобасын қарады, деп хабарлайды kznews.kz.
Түзетулер Президенттің мұғалімдердің құқықтарын қорғауды күшейту және олардың мәртебесін арттыру жөніндегі тапсырмасы аясында ұсынылды. Құжатты депутат Асхат Аймагамбетов таныстырды.
«Заң жобасында педагогтердің оқушылар үшін жауапкершілігін тек оқу процесі кезінде ғана айқындауды ұсынамыз. Сондай-ақ мұғалімдердің есептілікті бір мезгілде қағаз және электронды форматта жүргізуіне жол бермеу керек», – деді мәжілісмен.
Бұдан бөлек, келесі нормалар талқыланды:
ата-аналардың балалардың өмірі, денсаулығы және қауіпсіздігі үшін жауапкершілігін кеңейту;
мектептерде телефон пайдалану бойынша бірыңғай ережелерді бекіту;
оқушыларды жергілікті атқарушы органдар деңгейінде ғылыми қызметке тарту.
Үкіметтің бастамасымен негізгі заң жобасына сабақтас салаларға қатысты блоктар да енгізілді. Құжат денсаулық сақтау нысандарын салу және пайдалану бойынша мемлекеттік-жекеменшік әріптестік жобаларына қатысатын жеке серіктестердің тізімін кеңейтеді. Сонымен қатар, Қазақстанда жетекші шетелдік университеттердің тиімді қызметін құқықтық тұрғыдан реттеуді енгізеді және медициналық білім беруді жетілдіреді.
Қосымша ретінде депутаттар Әкімшілік кодекске өзгерістер енгізу туралы түзетулерді қарады. Талқылау барысында парламент мүшелері педагогтердің құқықтарын бұзғаны үшін жауапкершілікті күшейтуді көздейтін нормаларды алып тастады.
Дауыс беру қорытындысы бойынша депутаттар заң жобасын бірінші оқылымда бірауыздан мақұлдады.
Талқылау барысында Оқу-ағарту министрлігі өкілдері мектептерде телефонға толық тыйым салу жоспарланып отырмағанын, бірақ педагогтердің құқықтарын қорғау және білім сапасын арттыру үшін оларды пайдаланудың бірыңғай ережелері енгізілетінін түсіндірді.
