Журналист қоғамдағы әділетсіз марапаттау үрдісін сынға алып, нағыз еңбек адамдарының еңбегі елеусіз қалып жатқанын атап өтті:
«Аспаннан медаль жауып жатқандай әсер қалдырады. Бүгінде төсбелгі тағып, “ерекше еңбек сіңірдім” деп жүргендер тым көбейіп кетті. Ал шын мәнінде еңбектеніп жүрген жандар – таңнан кешке дейін мал соңында жүрген малшылар, жердің шаңын жұтып егін еккен диқандар, көшені сыпырып, қаланың тазалығын сақтайтын аналарымыз қайда?» – деп жазды ол.
Нұрсейіт Жылқышыбай марапаттың мәні жоғалып бара жатқанын айтып, қоғам ең алдымен адал еңбек иелерін бағалауы керек екенін жеткізді:
«Кейде екі сөздің басын қоса алмайтындар атақ алып жатады, ал қарапайым еңбек адамдары назардан тыс қалады. Шынымды айтсам, бұл жайт жанымды ауыртады. Марапат сөзбен емес, маңдай термен келу керек қой…» – деді журналист.
Желі қолданушылары оның пікірімен келісіп, пікір қалдырып, қоғамда еңбектің әділ бағалануы қажет екенін талқылауда.