Қазақстандық актер Мұрат Бисенбиннің ауыр дерт – қатерлі ісіктен қайтыс болғаны туралы хабар қоғамды есеңгіретті, деп хабарлайды kznews.kz.
Марқұмды соңғы сапарға шығарып салу рәсіміне келген әріптестері Жан Байжанов пен Саят Исембаев әлеуметтік желіде жарияланған видеолар мен стористерге байланысты қызу пікірталастың ортасында қалды.
Желіде тараған кадрларда әртістердің жерлеу рәсімі кезінде фото және бейнежазба түсіріп, оны әлеуметтік желіге жариялағаны байқалады. Бұл жағдай қоғамда екі түрлі көзқарас тудырды. Бірқатар қолданушылар мұны заманауи қоғамдағы қалыпты әрекет деп қабылдаса, басым бөлігі мұндай сәтті жариялау этикалық тұрғыдан дұрыс емес екенін алға тартты.
Пікір білдірушілердің айтуынша, қаралы жиын — марқұмға деген құрмет пен сабыр сақталатын ерекше сәт, сондықтан оны көпшілікке көрсету немесе желіге салу жақындарының сезіміне нұқсан келтіруі мүмкін. Олар танымал адамдардың мұндай жағдайда жауапкершілікпен әрекет етуі қажет екенін жеткізді.
