21 желтоқсан, 2025
Талдықорғанда 32 жастағы Айзат Жұманованың өліміне қатысты қозғалған қылмыстық іс бойынша сот процесі жалғасып жатыр, деп хабарлайды kznews.kz.
Сот отырысында тәуелсіз сот-медициналық сарапшы Тахир Халимназаров эксгумациядан кейін жүргізілген комиссиялық сараптаманың нәтижелерін таныстырды. Оның айтуынша, марқұмның денесіндегі барлық жарақаттар тірі кезінде салынған, ал қол-аяқтағы сүйретілу іздері өлімнен кейін пайда болған.
Сараптама барысында бірінші қабырғаның сынғаны, бет пен дененің әр бөлігінде көгерген іздер бары, сондай-ақ шүйде сүйектерінің сынып, зақымның бас сүйек негізіне дейін тарағаны анықталған. Осы жарақаттардың жиынтығы ауыр бас-ми жарақатына әкеліп, өлімге себеп болған.
Сарапшы өлімнің тікелей себебі ретінде бет тұсына бірнеше мәрте қатты соққы салыну салдарынан болған ауыр бас-ми жарақатын атады. Бұл зақымдар жұдырықпен немесе аяқпен ұру нәтижесінде туындауы мүмкін екенін айтты.
Соттағы сұрақтарға жауап берген Тахир Халимназаров барлық жарақаттардың қысқа уақыт ішінде салынғанын және марқұмның жүкті болғаны туралы ақпараттың шындыққа сәйкес келмейтінін мәлімдеді.
