2022 жылы Суданда сот 20 жастағы қызды опасыздық жасады деген айыппен таспен ұрып өлтіру жазасына кескен. Бұл туралы сол жылы BBC агенттігі хабарлаған, деп жазады kznews.kz.
Деректерге қарағанда, діни ұстанымы берік, ауылдық фермерлер отбасынан шыққан бойжеткеннің есімі қауіпсіздік мақсатында жария етілмеген. BBC мәліметінше, ол 2020 жылы күйеуімен ажырасқаннан кейін ата-анасының үйіне оралып, бір жыл өткен соң бұрынғы күйеуі тарапынан опасыздық жасады деген айыппен сотқа тартылған.
Ақ Ніл штатының Кости қаласында өткен сот отырысында шариғат заңдарына сүйене отырып, оған таспен ұрып өлтіру үкімі шығарылған.
Бұл шешім халықаралық құқық қорғау ұйымдары мен белсенділердің қатты наразылығын туғызды. Олар үкімнің адамгершілікке және әділдікке қайшы екенін айтып, бойжеткенді дереу босатуды талап еткен. Алайда сол кезеңде елде Әділет министрі болмағандықтан, істі заңды түрде қорғауға жауапты тұлға табылмаған.
Оқиға Судандағы әскери төңкерістен кейін билік әскери хунтаның қолына өткен тұста болған. Ел заңнамасы бойынша шариғаттағы “хадд” деп аталатын ауыр қылмыстарға – опасыздық, зина, ұрлық сияқты істерге – өлім жазасы, таспен ұрып өлтіру, дарға асу, аяқ-қолды кесу немесе дүрелеу секілді жазалар қарастырылған.
Халықаралық қауымдастық бұл шешімді қатаң сынға алып, Судандағы адам құқықтарының ахуалы мен әйелдерге қатысты әділетсіз сот тәжірибесін қайта қарау қажеттігін атап өтті.
Ескерту: Материал 2022 жылы BBC жариялаған ақпаратқа негізделген. Қазіргі уақытта бойжеткеннің тағдыры мен ісінің жалғасы туралы ресми дерек жоқ.