Бүгін, 11:46
Каспий теңізіндегі әскери оқу-жаттығу кезінде болған қайғылы оқиғаға байланысты тергеліп жатқан Данияр Хайрушевтің жұбайы әлеуметтік желіде мәлімдеме жасады.
Ол күйеуіне қатысты тергеу аяқталмай тұрып асығыс қорытынды жасамауға шақырды.
Әйелінің сөзінше, Данияр Хайрушев ұзақ жылдар бойы әскери салада қызмет етіп, өмірін Отан қорғауға арнаған. Сондықтан ол тағылған күдікке қатысты өз ұстанымын білдіруге және уәжін айтуға мүмкіндік алуы тиіс.
«Менің күйеуім кінәлі емес. Күйеуім бүкіл өмірін Отанға қызмет етуге арнады және осы жылдар бойы өз міндетін абыроймен атқарды. Ол біреудің сөзі мен жорамалдарға сүйеніп айыпталмай, алдымен өз уәжін айтуға мүмкіндік алуға лайық», – деп жазды ол.
Сондай-ақ әскери қызметкердің жұбайы отбасының ерекше қарым-қатынас талап етпейтінін, тек істің әділ әрі объективті тергелгенін қалайтынын атап өтті.
«Егер оған қатысты қандай да бір талап немесе айып болса, ол нақты айтылып, фактілермен расталуы керек. Барлық мән-жай анықталғанға дейін асығыс қорытынды жасамауды, оның ар-намысы мен қадір-қасиетіне нұқсан келтірмеуді және оны кінәлі деп атамауды сұраймын», – деді ол.
Оның айтуынша, отбасы қоғаммен және құқық қорғау органдарымен ашық диалогқа дайын. Алайда кез келген пікір мен бағалау заң талаптары мен адамға құрмет қағидалары аясында айтылуы тиіс деп есептейді.
Бұған дейін Қорғаныс министрлігі Данияр Хайрушевтің Каспий теңізіндегі әскери оқу-жаттығу кезінде болған қайғылы оқиғаға байланысты қылмыстық іс аясында ұсталғанын растаған.
Ол Қарулы күштердің Әскери-теңіз күштері бас қолбасшысының бірінші орынбасары қызметін атқарған. Қазіргі уақытта іс бойынша тергеу жүріп жатыр. Данияр Хайрушевтің кінәлі немесе кінәсіз екені тек соттың заңды күшіне енген үкімімен анықталады.
Данияр Хайрушев 2026 жылғы мамырда жоғары жауынгерлік әзірлікті қамтамасыз етуге қосқан үлесі мен қызметтегі жетістіктері үшін Бауыржан Момышұлы атындағы II дәрежелі «Айбын» орденімен марапатталған.
