Қайғылы оқиға Қостанай облысындағы Құсмұрын кентінде болған. Бес жасар бала ауыр жарақаттар салдарынан көз жұмған.
Ақпаратқа сәйкес, баланың басы мен денесінде ауыр жарақаттар анықталған. Оқиға орнына келген жедел жәрдем қызметкерлері оның қайтыс болғанын тіркеген.
Бастапқыда баланың өлімі жазатайым оқиғадан болуы мүмкін деген болжам қарастырылған. Алайда денесін тексеру барысында зорлық-зомбылық белгілері анықталғаны хабарланды.
Қазір аталған дерек бойынша адам өлтіру ісі тергеліп жатыр. Прокуратура күдіктінің ұсталғанын мәлімдеген.
Бала бұған дейін Астанада әжесімен тұрған
КТК телеарнасының мәліметінше, бес жасар бала өмірінің басым бөлігінде әжесінің тәрбиесінде болған.
Ол бұған дейін Астана қаласында тұрған. Алайда шамамен алты ай бұрын туған әкесі баланы өз отбасына алып кеткен.
Әкесі екінші жұбайымен бірге тұрған. Олардың отбасында басқа да балалар бар.
Ақпарат көздерінің хабарлауынша, әжесі немересін әкесіне бергісі келмеген. Соған қарамастан, әкесі баланың тұрғылықты жерін өзімен бірге болатындай етіп анықтауға шешім қабылдаған.
Сондай-ақ баланың туған анасы ата-ана құқығынан айырылғаны белгілі болды.
Отбасы бұған дейін қолайлы деп есептелген
Қостанай облысындағы бала құқықтары жөніндегі өңірлік уәкіл Несібелі Басенова жағдайға қатысты түсініктеме берді.
Оның айтуынша, баланың әкесі тұратын отбасы көпбалалы және бұрын әлеуметтік тұрғыдан қолайлы деп есептелген.
"Әкесі баланың тұрғылықты жерін анықтап, оны өзіне алып кеткен. Отбасы көпбалалы, негізінен қолайлы деп саналған. Бұған дейін бұл отбасына арнайы барып, қосымша тексеру жүргізуге негіз болған жоқ. Бірақ біз барлық мән-жайды әлі де тексеріп жатырмыз", – деді Несібелі Басенова.
Қазір жауапты органдар баланың қандай жағдайда өмір сүргенін, отбасы мүшелерімен қарым-қатынасын және қайғылы оқиғаға дейін қандай жағдайлар болғанын анықтап жатыр.
Күдікті ұсталды
Қостанай облысының прокуратурасы бес жасар баланың өліміне қатысты күдіктінің ұсталғанын хабарлады.
Алайда ұсынылған мәліметте оның кім екені және марқұм баламен қандай туыстық байланысы бары нақтыланбаған.
Оқиғаның барлық мән-жайы тергеу барысында анықталады. Күдіктінің кінәсі соттың заңды күшіне енген үкімімен ғана белгіленеді.