Бүгін, 17:08
Қазақстандық продюсер Баян Алагузова қоғамдағы діни ахуалға байланысты алаңдаушылық білдіріп, бұл мәселені ашық түрде көтерді. Оның айтуынша, соңғы уақытта әлеуметтік желілерде радикалды көзқарастағы топтардың белсенділігі артып, олар қоғамға өз талаптарын күштеп таңуға тырысып жатыр. Бұл жағдай оны қатты алаңдатқанын жеткізді, деп хабарлайды kznews.kz.
Алагузова мұндай үрдістер ұлттық дәстүрлер мен мәдени құндылықтарға кері әсер етіп жатқанын айтып, мәселені ұлттық қауіпсіздік деңгейінде қарастыру қажет деп санайды.
«Мен тиісті органдарға жүгінгім келеді, КНБ ма, прокуратура ма - білмеймін, бірақ бұл тоқтауы керек деп үміттенемін. Себебі бұл қазірдің өзінде ұлттық қауіпке айналып бара жатыр. Таңертеңнен кешке дейін әлеуметтік желілерде осындай адамдар шығып, бізді дәстүрімізден, мерекелерімізден айырып жатыр», — деді ол.
Продюсер дінге қарсы емес екенін, әр адамның сенім еркіндігі болуы керек екенін атап өтті. Алайда, оның пікірінше, сенімді агрессивті түрде насихаттау және қоғамға күштеп таңу дұрыс емес. Ол Қазақстанның зайырлы мемлекет екенін еске салып, адамдар өз сенімін жеке ұстануы тиіс екенін айтты.
Сондай-ақ, ол заң деңгейінде діни үгіт-насихатқа шектеу енгізу қажет екенін жеткізді. Оның айтуынша, қоғам бұл мәселеге бейжай қарамауы керек.
«Мен дінге қарсы емеспін, бұл әркімнің таңдауы. Бірақ оны агрессивті түрде таңуға болмайды. Біз зайырлы қоғамбыз, әрқайсымыз тыныш, мәдениетті түрде құлшылық жасаймыз. Сондықтан діни пропагандаға тыйым салатын заң енгізу керек деп санаймын. Мен балаларымның болашағы үшін алаңдаймын, олардың шариғатпен өмір сүргенін қаламаймын», — деді Баян Алагузова.
Ол сондай-ақ Қаңтар оқиғасын еске алып, радикалды көзқарастардың қауіпті салдары болуы мүмкін екенін айтты. Продюсер қоғам қайраткерлерін бұл мәселеге бейжай қарамай, ашық пікір білдіруге шақырды. Оның сөзінше, егер қазір әрекет етпесе, болашақта жағдай ушығуы мүмкін.
