BBC Culture басылымы кинематография тарихындағы 100 үздік фильм тізімін жасады. Бір қызығы, рейтинг голливудтық емес картиналардан құралған.
Әлемнің 43 елінің кино сыншылары қатысқан жұмыс күрделі жүйеде жүргізілген. Бірнеше сатыдан тұратын талдау төмендегідей нәтиже көрсетті.
Рейтингті Акира Куросаваның "Жеті самурай" туындысы бастады. Одан кейінгі орындарда Витторио Де Сикидің "Велосипед ұрлаушылар" фильмі мен Ясудзиро Одзудың "Токиолық оқиға" картинасы орналасқан. Алғашқы бестікті Куросаваның "Расемоны" мен Жан Ренуардың "Ойын ережелері" қорытындылады.
Ондыққа қарай қозғалсаңыз, Ингмар Бергманның "Персонасын", Федерико Феллинидің "Сегіз жарымы", Франсуа Трюффоның "400 соққысы" мен Вонг Кар Вайдың "Махаббатқа құмартуын" көре аласыз. Ал, 10-шы болып Феллини шебердің "Тәтті өмірі" тұрақтады.
Бізге жақын орналасқан елдерден ресейлік Андрей Тарковскийдің туындылары жоғары бағаланған. Оның "Айнасы" 20-шы, ал "Андрей Рублев" картинасы 40-шы сатыда. Одан 9 саты төменде "Сталкер" орналасса, 57-ші болып "Солярис" атауы жазылған.
Тізімде соңғы онжылдықта түсірілген кинолардан Асгар Фархадидің "Надер мен Симиннің ажырасуы" атты туындысы мен Михаэль Ханекенің "Махаббаты" бар.
