22 қазан, 2025
Оқиға 11-сынып оқушысымен болған. Ол асханадан алған тоқаштан бір тістеген сәтте тіліне қыл-қыбыр жабысып, дереу мектеп әкімшілігіне хабар берген. Ата-аналардың айтуынша, мектеп ұжымы жағдайды сыртқа шығармауға тырысқан.
Ата-аналар шу көтергеннен кейін білім бөлімі сараптама тобын құрып, асхананы тексеруге кіріскенін хабарлады. Алайда санитарлық-эпидемиологиялық бақылау қызметі бұл мәліметті теріске шығарып, мектепке тексеріспен бармағандарын айтты. Себебі оқиға бойынша ресми арыз түспеген.
«Бізге шағым бүгін ғана келіп түсті. Оқушының ата-анасына құқықтары түсіндірілген соң ғана өтініш қабылданды», – деді қалалық санитария-эпидемиология басқармасының басшысы Шыңғыс Чокушев.
Қазір мамандар мектеп асханасын жоспардан тыс тексеруді жоспарлап отыр. Ал оқиға жөнінде хабарды жасырып қалуға тырысқан директордың тәрбие ісі жөніндегі орынбасарына сөгіс берілді.
