Бүгін, 16:11
Белсенді Азамат Сәрсенбаев Маңғыстау облысының Баянды ауылында тұратын, әскери қызмет кезінде қаза тапқан Алмас Көбеновтің отбасының қазіргі жағдайы туралы жазба жариялады.
Оның айтуынша, Алмас бес балалы отбасының кенже ұлы болған. Марқұмның екі ағасы да бұған дейін әскери борышын өтеген, деп хабарлайды Ozgeris.info.
Сәрсенбаевтың мәліметінше, сарбаздың анасы Меруерт Дүйсенбаева ішек қатерлі ісігінің екінші сатысымен күресіп, химиотерапия қабылдап жүр. Ал әкесі Жүсіп Оразалиев жұбайының күтіміне байланысты тұрақты жұмыс істей алмайды.
"Ұлымның қазасы болған күні анасы онкологиялық ауруына байланысты ем қабылдауы керек еді. Алайда қайғылы жағдайға байланысты емін үйде өтуге тура келді", – деп жазды белсенді отбасының сөзін жеткізіп.
Отбасының үлкен ұлы Қылмыстық-атқару жүйесінде қызмет етеді. Ал ортаншы ұлы жұмыс істеу үшін Ақтөбе облысына кеткен. Ата-анасы оның Маңғыстауға оралып, туған жерінен жұмыс тапқанын қалайды.
Белсендінің жазуынша, жергілікті билік Алмасты жерлеуге байланысты шығындарды өтеу үшін отбасына материалдық көмек көрсеткен.
Сонымен қатар отбасының банк шоттары несие бойынша мерзімі өткен төлемдерге байланысты бұғатталған. Осы себепті қазір оларға қаражат аударуға арналған қолжетімді деректемелер жоқ екені айтылды.
"Бәріміз үшін қазір маңыздысы – Президент жариялаған өтемақының қаза тапқан сарбаздардың отбасыларына толық көлемде берілуі. Бұл ең болмаса осы отбасыға қолдау болар еді", – деп жазды белсенді.
