Бүгін, 12:53
Маңғыстау облысында жас жұбайлар референдумға ерекше тәсілмен келіп, көпшіліктің назарын аударды. Олар дауыс беруге Каспий теңізі арқылы катермен жетіп, елдегі демократиялық үдерістерге белсенді қатысып жатқанын көрсетті, деп хабарлайды kznews.kz.
Бұл ерекше оқиға өңірдегі дауыс беру күнінің ең жарқын сәттерінің біріне айналды. Катермен келген жас жұбайлардың видеосы әлеуметтік желілерде тез таралып, желі қолданушылары арасында қызу талқыланды.
Жол үстінде жас жұбайлар Каспий теңізінің аясында love story стилінде бірнеше бейнеролик түсірген. Кадрларда теңіздің көркем көріністері, су бетімен серуендеу сәттері және жағалауға келіп тоқтаған мезеттер бейнеленген. Осылайша олар өмірлеріндегі ең маңызды күндердің бірін – үйлену тойын – ел үшін маңызды қоғамдық-саяси оқиғамен ұштастырды.
Облыстық сайлау комиссиясының мәліметінше, бұл жағдай өңір жастарының қоғамдық өмірге белсенді араласып, азаматтық жауапкершілік танытып отырғанын көрсетеді.
Дауыс бергеннен кейін жас жұбайлар референдумға қатысу өздері үшін ерекше әрі символикалық мәнге ие болғанын айтты. Олардың сөзінше, отбасылық өмірдің басталуымен тұспа-тұс келген бұл күнді тек той күні ретінде ғана емес, ел болашағы үшін маңызды оқиға ретінде де есте қалдырғысы келген.
